• GELEI DEUR GENADE
  • DIENSBAAR UIT DANKBAARHEID

Oor Geloofstroom se storie & span

Ons wil behulpsaam wees met Bybelonderrig en om die Goeie Nuus van Jesus Christus te versprei.

Nooi Herman as Spreker

Wie is Geloofstroom?

Geloofstroom is ’n geregistreerde nie-winsgewende maatskappy, onder leiding van Herman de Kock. Ons fokus om, tot die beste van ons vermoë en in afhanklikheid van die Here, Bybelgetroue inhoud en ad hoc impaksgeleenthede te skep en deel, met die doel om soekendes, gelowiges en leergieriges te ondersteun en versterk binne ‘n inter-kerklike konteks.

Ons doen dit in nederigheid, bewus daarvan dat ons self steeds leer en groei, en dat ons begrip altyd ondergeskik bly aan die Woord van God en leiding van die Heilige Gees. Ons verlang om self nader aan Christus te leef en Hom getrou te volg. Ons loop graag die pad Huistoe saam met ander.

Alhoewel die De Kock-gesin die kernspan vorm van Geloofstroom is ons dankbaar en verwelkom Geloofstroom ondersteuning en betrokkenheid van ander gelowige vrywillige mede-werkers. Ons staan in bediening sáám met ander gelowiges en ons eie gemeentes.

Ons Span

  • Herman de Kock – Bedryfshoof / Hoofaanbieder
  • Emmie de Kock – Organiseerder
  • Hanri Swart – Rekenmeester
  • Leon Geel – Mede-aanbieder van video’s
  • Leon Barnard – Videograaf
  • Hanna de Kock – Instagram
  • Emma de Kock - Kinderaanbiedings

Die De Kock-Gesin

  • Herman en Emmie de Kock, saam met hul dogters Hanna en Emma, vorm ons kernspan en het Geloofstroom begin.
  • Herman is 'n opgeleide prediker met 'n akademiese teologiese agtergrond, MBA-graad en meer as 25 jaar se ervaring as koöperatiewe leier in bankwese en die sakewêreld.
  • Emmie het 'n regsagtergrond as praktiserende prokureur, is 'n SA Business Coach en het opleiding in NLP (Neuro-Linguistic Programming) en lewensafrigting. Sy bemoedig en help mense prakties groei.
  • Herman en Emmie is ervare kinderkerk-aanbieders en gekwalifiseerde Paidion jeugwerkers.

'n Gesin wat dien

Liefde vir die Woord

Groei in geloof, leef uit genade

'n Hart vir mense

Ons Storie

2017
2020
2020+
2021
2025
2026+
'n Klein Begin

'n Selgroep vir laerskool-kinders by die De Kock-gesin se huis in Midstream, Gauteng nadat Emmie haar regspraktyk verkoop het. Maandelikse byeenkomste met Bybellesse en aktiwiteite saam.

Digitale Bediening

Tydens Covid skuif Geloofstroom aanlyn. Fokus brei uit na jongmense en ouers. Meer as 140 geloofsgesprekke met Ds Leon Geel word opgeneem en aanlyn gedeel.

Skryf & Deel

Sedert 2020 skryf Herman ook maandeliks vir JUIG! Tydskrif artikels wat ouers ondersteun in Bybelonderrig en geloofsvorming binne die huisgesin.

Nuwe Tuiste

Die De Kock-gesin verhuis in Desember 2021 van Gauteng na George in die Wes-Kaap. Geloofstroom gaan voort as 'n digitale en projekgebaseerde bediening.

Terug na Kinders

Geloofstroom loods weer 'n in-persoon vakansieprogram vir kinders 8 - 12 jaar, saam met jongmense as groepleiers.

Vakansieprogram
Nuwe Seisoen

Herman beëindig sy voltydse loopbaan in die bankwese om meer tyd te gee aan teologies studie en bediening onder Geloofstroom. 

Nooi Herman

Ons Fondasie

Ons vind dit behulpsaam om vooraf kortliks die fondasie van ons wêreldbeskouing en basiese geloof te deel. Ons voel ons kan baie hierop uitbrei, maar hou dit verkort om ‘n vinnig oorsig te gee hoe ons sekere temas benader.

Die Bybel

Ons glo die Bybel is die geïnspireerde en gesagvolle Woord van God. Dit is die hoogste en finale gesag vir geloof en lewe en dien as ons riglyn vir waarheid en praktyk.

Ons benader die Bybel met eerbied, gebed en afhanklikheid van die Heilige Gees. Dit vorm die fondament van alles wat ons leer en verkondig.

Die Bybel bestaan uit die Ou Testament (39 boeke) en die Nuwe Testament (27 boeke).

(Ps 119:105; 2 Tim 3:16–17)

God Drie-enig

Ons glo daar is een ware God wat bestaan in drie Persone: die Vader, die Seun (Jesus Christus) en die Heilige Gees.

Hoewel die woord “drie-enig” nie in die Bybel voorkom nie, word hierdie waarheid regdeur die Skrif geopenbaar.

God is die Skepper van hemel en aarde, ewig, almagtig, alwetend en alomteenwoordig. Hy is heilig, regverdig, goed en vol genade. Daar is niemand soos Hy nie.

God is liefde en verlang verhouding met die mens. Die Vader het Sy enigste Seun aarde toe gestuur om as ‘n mens vir ons sondes te betaal sodat mense wat glo nie verlore kan gaan nie, maar die ewige lewe by God kan hê. 

(Joh 1:12; Joh 1:18; Joh 3:16; Joh 10:30)

Verlosssing van Sonde

Ons glo dat alle mense deur sonde van God geskei is en dat elke mens gebore word met ’n sondige natuur wat strydig wil optree met God se perfekte wil, opdragte en moraliteit.

Die sonde verdien die dood en God is regverdig en getrou aan Sy Woord.

Die mens kan homself nie red nie. Verlossing is slegs moontlik deur God se genade, deur geloof in Jesus Christus.

Jesus Christus het aan die kruis gesterf vir ons sondes en is uit die dood opgewek. Deur Hom ontvang ons vergifnis, nuwe lewe en versoening met God.

 (Rom 5:1; Rom 6:23; Ef 2: 8-9)

Jesus Christus

Ons glo dat Jesus Christus die Seun van God is, wat deur die Heilige Gees verwek is en uit die maagd Maria gebore is.

Hy is volkome God en volkome mens. Hy het vir ons sondes gesterf, op die derde dag uit die dood opgestaan en opgevaar na die hemel, waar Hy aan die regterhand van die Vader vir ons intree.

 

(Joh 3:16; 1 Kor 15:3)

Die Heilige Gees

Ons glo die Heilige Gees is deur God gestuur om die werk van Jesus Christus in gelowiges te bevestig en te vestig.

Hy oortuig mense van sonde, lei hulle na Christus en woon in elke gelowige wat wedergebore word.

Die Heilige Gees bemagtig gelowiges om ’n nuwe lewe te leef, gee geestelike gawes en lei ons in alle waarheid.

(Joh 14:16–17; Hand 2:1–4; Rom 8:9–11; 1 Kor 12:4–7; Gal 5:22-23)

Die Kerk

Ons glo alle wedergebore gelowiges vorm die liggaam van Christus, waarvan Jesus die Hoof is.

Die Kerk is die liggaam van Christus en bestaan uit alle nasies, volke en tale in alle lande, en word sigbaar in plaaslike gemeentes uitgeleef.

Ons glo dat eenheid in die liggaam van Christus deur die Heilige Gees bewerk word, ten spyte van verskillende denominasies en tradisies.

Ons glo dit is ’n geheimenis hoe die Kerk en die volk Israel bymekaar inskakel, en dat ons in nederigheid moet leef, omdat God Hom oor ons ontferm het en deel maak van Sy ewige volk en familie. Ons erken dat God se raadsplan en genade groter is as ons volledige verstaan en dat redding slegs moontlik is deur Jesus Christus aan te neem as persoonlike Verlosser. 

Die Kerk is geroep om die evangelie te verkondig, dissipels te maak, die doop en nagmaal te bedien, en as lig en sout in die wêreld te leef tot eer van God.

(Hand 2; Ef 3:6; Rom 11:25; Matt 5:13–16; Matt 28:18–19; Ef 4:4–6)

Geestelike Realiteit: Engele & Die Duiwel

Ons glo daar is ’n geestelike realiteit wat die sigbare wêreld oorskry. Die Bybel leer van engele, die duiwel en bose magte.

God is soewerein oor alles en rus Sy kinders toe om geestelik standvastig te bly. Hy gee ons gesag om in Sy Naam op te tree en ‘n wapentoerusting om aanvalle af te weer. Jesus het vir ons die voorbeeld gestel hoe om die duiwel tee te staan en om daagliks tot ons Vader te bid vir beskerming en verlossing van die bose.

Die duiwel wil net mislei, verwar, verdeel, steel, breek en doodmaak. Gelowiges hoef nie in vrees te leef, of oormatig te fokus op die geestelike realiteit nie, maar word geroep om waaksaam te wees en in God se krag en oorwinning te lewe.

Die duiwel is ’n leuenaar en aanklaer, maar hy is beperk en reeds oorwin in Christus.

(1 Sam 17: 45, Mat 4: 1-11, Mat 6:13, Joh 1:10, Ef 6:10–13, Open 20:10)

Ons Lewende Hoop

Ons glo in die persoonlike en sigbare wederkoms van Jesus Christus.

Hierdie hoop motiveer ons tot geloof, volharding en diens.

Ons glo in die opstanding van die liggaam, die ewige lewe vir dié wat in Christus glo, en die ewige skeiding van God vir dié wat Hom verwerp.

(Joh 14:1–3; 1 Tess 4:16–17; 1 Kor 15:20–22; Open 21:1–4)